Langsung ke konten utama

Bejejalanan Ke Vila Aranaway

Sebagai urang Banjar yang bediam di Gambut, ulun wahini jadi rancak bejalanan ke daerah Banjarbaru gasan membawai kanakan piknik. Soalnya di Banjarbaru wahini ada banyak banar tempat wisata gasan keluarga yang berupa tempat wisata alam. Jadi amun hari libur ulun sekeluarga bececarian wadah gasan bejalanan di Banjabaru dan sekitarnya ni.

Salah satu wadah wisata yang pernah ulun datangi lawan keluarga ngarannya Villa Aranaway. Ini amun berdasarkan lokasinya andakannya di Desa Kiram Atas Kecamatan Karang Intan Kabupaten Banjar. Andakannya ni beparakan aja pang lawan wisata Kiram yang ada mesjid Bambunya tu. Beda belokan aja inya.

Ulun ke Villa Aranaway ni dua kali. Pertama lawan kekawanan kantor imbah tu bebulik pulang membawai mama lawan kekanakan pas awal tahun 2022 semalam. Hibak banar urang pas kami ke sana tu. Pas jua kalo virus Corona sudah mulai berkurang penyebarannya jadinya Vila-nya sudah kawa didatangi urang banyak. 

Pemandangan Vila Aranaway

Amun bejalanan ke Aranaway ini kita kawa lewat Banjarbaru atau lewat jalan Trikora. Amun lewat Banjarbaru kena rutenya tu melalui Simpang Empat Banjarbaru menuju ke Tahura Sultan Adam nah kena ada belokannya gasan ke Aranaway. Amun handak lewat jalan Trikora bebelok di jalan Brimob imbah tu ke jalan Palam Raya - Jalan Mistar Cokrokusumo - Cempaka hanyar bebelok ke Aranaway. Sama aja pang perasa ulun jauhnya. Hehe.

 Nah amun sudah sampai di Aranaway kena pian dimintai tiket masuk 5000 seikung urang. Di Aranaway ada pemandangan sungai lawan pondokan-pondokan halus gasan bemalam tu nah. Sungainya halus aja pang kawa gasan kanakan bemain banyu lawan mandian tapi jangan kada ingat pian meawasi kanakan kalo pina banar ae larut kena. Amun kanakan ketuju besepedaan kawa jua membawa sepeda di Aranaway soalnya lapangannya luas haja. 

Sungai Aranaway

Ada juga gazebo gasan bekumpulan lawan kekawanan. Handak bemasakan atau karaokean kawa jua di gazebo ni. Biaya sewa gazebo di Aranawa ni semalam tu 40 ribu pang per 3 jam. Kada tahu amun tahun 2023 ni benaik atau kada. Nah, biasanya mun tanggal habang gazebonya ni bisa hibak lo, pian kawa jua menyewa tikar gasan bedudukan di lapangannya tu 10 ribu harga sewanya. Lumayan lo daripada kada dapat tempat. Atau mun pian beniat handak bemalam kawa jua menyewa pondokannya tu langsung gasan sekeluargaan cuma ulun kada tahu nah berapa sewanya semalam amun pondokannya tu.

Vila di Aranaway

Di Arawanay ni selain ada gazebo lawan pondokan ada jua warungnya sekira kita kada kelaparan pas di sana. Menunya ada pop mie bekuhup lawan iwak ayam goreng. Harganya jua kada larang jadi kada perlu khawatir buhan pian amun misal kada ingat membawa makanan pas bejalanan ke sana. Ulun pang semalam pina musti membawa iwak sekalinya nasinya tetinggal untung di situ ada bejual nasi jadi kada jadi kelaparan kami.

Kafe di Vila Aranaway

Nah, sebelum buhan pian bulikan jangan kada ingat befoto lah di Aranaway ni banyak haja spot bagus gasan befoto gasan dipasang di instagram. Pintar-pintar ja pian meatur pose sekira fotonya banyak di-like kekawanan. Hehe. 

Ingat jua amun ada sampah jangan dibuang sembarangan lah supaya tempatnya tetap barasih dan nyaman gasan didatangi lagi. 

Toilet Vila Aranaway

Seitu aja nah kisah ulun bejejalanan ke Villa Aranaway. Semoga ada manfaatnya gasan kawan seberataan.


***

Nang manulis: www.ayanapunya.com

Nang manyunting: www.irabooklover.com

Label:

Komentar

  1. irabooklover25 Januari 2023 pukul 17.38

    Setuju banar bila tempat wisata n ada kafe/warungnya. Rancaknya t kada ingat mambawa bekal. Pas haus atau lapar imbah bajalanan/bamainan langsung ja lagi cuss ka warung 😁

    BalasHapus
  2. Antung apriana26 Januari 2023 pukul 13.04

    wah rasa lawas kada ke aranaway ni nah kyp yo wahini masih kayak semalamkah yo tempatnya

    BalasHapus
  3. Asep Lukman9 April 2023 pukul 09.29

    Seru sepertinya apabila nanti ada tugas dari kantor ke Kalimantan Selatan coba untuk mengunjungi Vila Aranaway di Banjarbaru ini, yang saya suka di daerah kalimantan selatan itu adalah sop ikan patinnya yang enak, hehehe

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami...
17 komentar
Baca selengkapnya

Kisah Intingan wan Dayuhan

Halo sabarataan, batamuan pulang lawan ulun, Nisa. Kali ini, ulun handak mangisahakan kisah Intingan wan Dayuhan nang rajin tu selalu dikisahakan bila ulun handak guring waktu lagi halus dulu. Kisahnya ni turun temurun dari zaman datu, nini, mama, anak sidin, dan cucu sidin, bisa jua kaina sampai ka buyut sidin. Kisahnya nih rami, sampai taguring guring mandangari kisah ini ja, lucu pulang han. Bila pian suah mandangar kisah Intingan wan Dayuhan, bararti kita sama. Zaman bahari kadada pang yutube wan intirnit. Nang ada kisah dari muntung ka muntung ja. Nang kaya apa kisahnya, ni ulun kisahakan nah ka bagian pian sakira kada panasaran. Kisah Intingan wan Dayuhan  Zaman bahari ada dua ikung badua ba-ading nang bangaran Intingan wan Dayuhan. Kisahnya Intingan nang jadi kaka, Dayuhan ading nya. Ibarat kata, si Dayuhan nih inya orangnya kada tapi paham apa yang di padah-akan tu, atau bahasa kitanya, ada nang kurang kaitu nah. Ujar kisah si ading nih kada hakun sakulah,...
22 komentar
Baca selengkapnya

Pantai Batakan Baru

Assalamu’alaikum kekawanan seberataan. Lawas rasanya nah kada bekisahan di blog Female Blogger Banjarmasin. Nah, kali ini ulun handak bekisah tentang pengalaman bemalam di Pantai Batakan Baru. Amun urang Banjar pasti tahu lho lawan Pantai Batakan Baru ini? Pantai Batakan ini lokasinya di Desa Panyipatan di Kabupaten Tanah Laut sana. Di Kabupaten Tanah Laut ni dasarnya wadahnya wisata pantai di Kalimantan Selatan. Amun bahari tu kita tahunya pantai Takisung lawan Batakan wahini sudah banyak pantai lain yang dibuka kaya Pantai Turki dan pantai lainnya. Nah, jadi kisahnya waktu hari raya Idul Fitri semalam ulun sekeluargaan bejalanan ke Pantai Batakan. Total ada 13 urang nang tulakan. Ada yang bemobil bedempetan ada jua nang bekendaraan. Kami tulak pas hari raya kedua lebaran menurut pemerintah tu nah, pas banar lho gasan piknikan. Mulai Banjar kami tulak sekitar jam 11. Amun hari normal ke Pantai Batakan tu biasanya 2-3 jam haja kalo lah. Nah, berhubung kami tulakan pas Hari Raya, ...
2 komentar
Baca selengkapnya