Akhirnya FBB betamuan pulang

Kada kerasaan kalo lah, pandemi nih labih pada satahun. Eh kerasaan banar pang lah, cuma ya kaitu pang. Balarut haja sudah barataan. Kadada guna kalo mengeluh, sudah ai kita jalani haja apa yang ada. Jadi lo, mulai pandemi tu selawas itu jua FBB tu kadeda acara betamuan. Semua jaga jarak. Jar urang tuh social distancing.

 

Nah buhan FBB nih rasa-rasanya betamuan tu terakhir kali dua tahun yang lalu. Saking lawasnya event terakhir. Buhan blogger Banjarmasin pasti sudah hafal bahwa di Banjarmasin nih jarang banar ada acar blogger. Lain pang kaya di Jabodetabek, rancak tebarung-barung teimbai acara bloggernya saking banyaknya acara disana. Jadi lo, imbah event terakhir, di tambah lawan pandemi, jadilah parak dua tahun kami kada betamu.

 

Ada pang betamu pas ultah fbb tahun semalam tuh, tapinya kami batasi jua. Soalnya saat itu Covid lagi bangat-bangatnya lawan jua kadada vaksinnya masih. Saat itu kami sadikit haja jua 9 orang yang betamuan. Itu gin rasanya himung banar sudah ada kesempatan betamuan. 

 

 

Waktu itu ada 4 pengurus lagi live zoom kalo acara ultah fbb, lawan member fbb jua 5 orang nang datang langsung. Betamuannya di favehotel nang membari sponsor. Kebetulan jua favenya cum membolehi 10 orang betamuan.

 

 

Mbah tu, selang waktu beganti, beberapa member FBB kena covid jua, lalu  lawas pulang kada betamu. Lalu munculah vaksin, pina bekurang pang nah penderita Covid meskipun kada bujuran hilang wabah penyakitnya tapi temending ai kalo daripada semalam nang bangat banar tuh. Akhirnya FBB ada kesempatan pulang diundang dalam acara pembukaan Warung Wakaka.

 

 

 

Ya akhirnya FBB betamuan pulang. Meskipun kada banyak jua, tapi rasanya himung banar bisa betamuan lagi 8 orang. Tapi wahini orangnya rami banar. Rasa himung FBB bisa bergabung lawan bubuhan youtuber dan selebgram Banjarmasin gasan opening Wakaka. Mungkin wahini blogger dianggap sudah bisa promosi dan jua membawai urang gasan datang. Alhamdulillah.

 

Kami bejanjian datang baju hirang supaya kompak dan bagus gasan di foto, sekalinya urang nang datang rata-rata baju hirang jua, maginnya pegawainya Wakaka baju hirang berataan, hahaha... Kami befoto-foto bersama gasan kenangan. Makan di satu ruangan kami bebarian satu sama lain. Uma ai rasanya himung rasa makan sekeluarga ya kalo. Apalagi lawas banar dah kada betamuan. Silaturahmi jelang puasa, sambil bekisahan lawan saling memoto akan heboh banar tu pang.

 

Senangnya lagi tuh, karena Warung wakaka-nya dasar bagus gasan wadah bakumpulan. Makanannya nyaman, harganya sadang haja, ada wifi jua lawan mushola.Banyak jua spot nang bagus gasan bakudak, jadi hibak memori aur bepotoan ja mulai datang. Mbah tu makanannya banyak banar ada 200 labih jenisnya. Kebuliangan abut saurang memesan handak nang mana. Tapi berataan nyaman pang perasa kami lah. Kadeda yang zonk. Jadi himung jua kami datang beramian untuk warung makan nang dasar memang nyaman lawan bagus wadahnya. Apalagi FBB nih kada samuaan bediam di Banjarmasin lok, ada jua yang datang dari luar kota kaya ulun dari Banjarbaru, ada dari Gambut lawan Liang anggang jua. 

 

Nah kaitu pang tadi kisah kami nang akhirnya ada kesempatan betamuan pulang imbahnya lawas banar perai betamuan acara blogger karena ada covid. Kehandak kitanya nih, kena kawa betamuan lagi lebih banyak orangnya lawan member-member lain jua tapi kondisinya mudahan sudah baubah. Supaya kada habut memakai masker-masker atau bebasuh tangan tarus. Mudahan aja pandemi lakas pergi. Jadi FBB kena bakumpulan lagi pas sudah aman ya lok. Makasih lah sudah membacai kisah pendek ulun. Salam.

 

Nang Manulis: Ruli Retno Mawarni