Langsung ke konten utama

Batamat AlQuran Khas Buhan Nagara

Assalamualaikum, kayapa habar buhan pian sabarataan. Mudahan sehat wal 'afiat. Aamiin.
Disini, walaupun sudah lewat,  ulun handak maucapakan selamat lebaran. Maaf lahir batin lah 😊


(sumber: klikkalsel.com)

Batamat AlQuran digawi biasanya bila handak bakawinan saminggu badahulu atau tiga hari sebelum acara nikahan dimulai.

Jadi kisahnya pas ulun lagi halus, ulun menamui kaka betamat gaya bagian Nagara. Kayapa batamat gaya buhan Nagara tu? Batamatnya kada pakai payung kambang, malainkan payung hintalu itik sakulilingan diisi wan ngaran-ngaran nang handak diandak di sana. Saumpama ditulis ngaran (khairun, nisa, putri), ditambah hintalu burung puyuh. Jadi kadada payung kambang, nang ada payung hintalu.

Nah kebetulan itu lagi ulun halus. Jadi ulun babaya ingat haja kaya apa kejadiannya.

Pas kabatulan, ulun ada umur pas sudah ganal nih melihat kayapa kisah sabujurnya batamat buhan Nagara. Nah semalam sapupu ulun ada banikahan sakaligus resepsi. Jadi ulun manyampatakan bamalam di sana lawan malihat langsung kaya apa acaranya.

Samula kisahnya tu batamat kaya biasa, membaca jus 30 sampai habis. Payungnya kada dipingkuti, tapi digantung di atas palapun rumah. Karena rumah kayu jadi nyaman dijarat bagantung manjuntai. Nang uniknya pas mambaca surah Al-Fill kada dirunggut atau dihambur, tapi tatap khusus membaca sampai habis.

Nah, tarus pang pabila barabut hintalunya? Pas sudah tuntung acaranya, jadi kakanakan atau orang tuha barabut badiri di bawah payung, sambil mananai membuka tangan. Rami banar bagurumbunan handak maambil afwah berkah dari hintalu-hintalu nang ada.

Nang unik dari bagian batamat ini adalah dari cara barabut hintalu lawan jua payungnya lain payung kambang. Nah itu pang nang unik dari acara batamat bagian Nagara ini. Tapi untuk pambacaan dan doa sama haja kaya kita bubuhan banjar nih.

Kaitu kisahnya batamat ala bagian Nagara,. Ada kisahkah betamat di tempat buhan pian? Kasi kisahakan jua di sini.

Salam Sugar ❤

***
Nang manulis: Nisa @ www.nisazet.com
Nang ma-edit: Ira @ www.irabooklover.com

Label:

Komentar

  1. antung apriana18 Juni 2020 pukul 13.58

    aku sampai wahini kada pernah nah menamui acara betamat apalagi yang kayak buhan negara ni. hihi

    BalasHapus
    Balasan
    1. Female Blogger of Banjarmasin22 Juni 2020 pukul 09.02

      Inggih Ka, mudahan kaena kawa tatamui cara batamat nang unik kayak buhan Nagara ni ^^

      Hapus
  2. Nusantarakreatif.id | Putri Santoso18 Juni 2020 pukul 15.34

    ulun penasaran lawan acara betamat Al-Qur'an ini
    tapi belum pernah betamu acara betamat nih. rasa hendak ka nagara

    BalasHapus
  3. PutriSB18 Juni 2020 pukul 20.25

    Tetamu tulisan nginih ulun taingat bahari batamatan kaya nginih di amuntai, bebolag kapala, bebaju manik - manil tuh behari, baju urang datang haji jar..

    Bahari tiap kakanakan betamat kaya nginih dikampung, tapi Wahini rasa kada suah lagi menamui betamat kaya ini nih...

    Mudahan dilestarikan lagi budaya banjar kita betamat nih...

    BalasHapus
    Balasan
    1. Female Blogger of Banjarmasin22 Juni 2020 pukul 09.04

      Bujur Ka, mun di Amuntai pakai baju urang datang haji bila batamat XD

      Hapus
  4. Triyatni A.18 Juni 2020 pukul 21.04

    Ulun lupa batamat di Makassar kayak apa. Tapi selama di Banjarmasin ni waktu bagawi jadi guru ulun biasa ikut juga cara kayak ini, ramai

    BalasHapus
  5. Mia Yunita19 Juni 2020 pukul 09.32

    Aih uniknya leh, bapayung intalu itik. Suahnya nang bapayung kambang pang

    BalasHapus

Posting Komentar

Postingan populer dari blog ini

Tidak Kalah dengan Ibukota Provinsi, Ini 4 Kafe di Barabai yang Wajib Dikunjungi

Halo Kaka-Kaka bungas yang lagi membaca tulisan ini, mudahan sehat sabarataan lah. Kenalkan dulu nah, ulun Eca anggota FBB jua dan tulisan ini nih tulisan perdana ulun di Banjar Corner. Selamat membaca 🤗 Tau lah bubuhan pian di wadah ulun Barabai bisi 4 kafe nang kada kalah lawan di Banjarmasin? Han kada tau kalo, makanya bacai sampai tuntung lah. Barabai Hulu Sungai Tengah sabujurnya lain kota kelahiran ulun. Tapi, kayapa pun jua, ulun sudah lawas bagana di sana dan sudah tarasa jadi tanah kelahiran ulun saurang. Ulun mulai bagana di Barabai semenjak kelas 1 SMP. Waktu ulun masih sakulah itu, dasar balum ada nang ngarannya kafe nginih. Ulun lawan kakawanan dahulu bejalanan ke kedai atau depot haja. Nah, wahini lumayan banyak sudah cafe yang kawa dipakai hagan “feed” Instagram bubuhan pian. Ini nah yang menurut ulun musti pian kunjungi. 1. Hero Cafe Nah, kabalujuran banar ulun lawan anggota FBB nang lain suah bakumpulan di Hero Cafe ini mun pas handak betamuan. Di sini rami...
17 komentar
Baca selengkapnya

Kisah Intingan wan Dayuhan

Halo sabarataan, batamuan pulang lawan ulun, Nisa. Kali ini, ulun handak mangisahakan kisah Intingan wan Dayuhan nang rajin tu selalu dikisahakan bila ulun handak guring waktu lagi halus dulu. Kisahnya ni turun temurun dari zaman datu, nini, mama, anak sidin, dan cucu sidin, bisa jua kaina sampai ka buyut sidin. Kisahnya nih rami, sampai taguring guring mandangari kisah ini ja, lucu pulang han. Bila pian suah mandangar kisah Intingan wan Dayuhan, bararti kita sama. Zaman bahari kadada pang yutube wan intirnit. Nang ada kisah dari muntung ka muntung ja. Nang kaya apa kisahnya, ni ulun kisahakan nah ka bagian pian sakira kada panasaran. Kisah Intingan wan Dayuhan  Zaman bahari ada dua ikung badua ba-ading nang bangaran Intingan wan Dayuhan. Kisahnya Intingan nang jadi kaka, Dayuhan ading nya. Ibarat kata, si Dayuhan nih inya orangnya kada tapi paham apa yang di padah-akan tu, atau bahasa kitanya, ada nang kurang kaitu nah. Ujar kisah si ading nih kada hakun sakulah,...
22 komentar
Baca selengkapnya

Pantai Batakan Baru

Assalamu’alaikum kekawanan seberataan. Lawas rasanya nah kada bekisahan di blog Female Blogger Banjarmasin. Nah, kali ini ulun handak bekisah tentang pengalaman bemalam di Pantai Batakan Baru. Amun urang Banjar pasti tahu lho lawan Pantai Batakan Baru ini? Pantai Batakan ini lokasinya di Desa Panyipatan di Kabupaten Tanah Laut sana. Di Kabupaten Tanah Laut ni dasarnya wadahnya wisata pantai di Kalimantan Selatan. Amun bahari tu kita tahunya pantai Takisung lawan Batakan wahini sudah banyak pantai lain yang dibuka kaya Pantai Turki dan pantai lainnya. Nah, jadi kisahnya waktu hari raya Idul Fitri semalam ulun sekeluargaan bejalanan ke Pantai Batakan. Total ada 13 urang nang tulakan. Ada yang bemobil bedempetan ada jua nang bekendaraan. Kami tulak pas hari raya kedua lebaran menurut pemerintah tu nah, pas banar lho gasan piknikan. Mulai Banjar kami tulak sekitar jam 11. Amun hari normal ke Pantai Batakan tu biasanya 2-3 jam haja kalo lah. Nah, berhubung kami tulakan pas Hari Raya, ...
2 komentar
Baca selengkapnya