Kisah Intingan wan Dayuhan

Halo sabarataan, batamuan pulang lawan ulun, Nisa.

Kali ini, ulun handak mangisahakan kisah Intingan wan Dayuhan nang rajin tu selalu dikisahakan bila ulun handak guring waktu lagi halus dulu. Kisahnya ni turun temurun dari zaman datu, nini, mama, anak sidin, dan cucu sidin, bisa jua kaina sampai ka buyut sidin.

Kisahnya nih rami, sampai taguring guring mandangari kisah ini ja, lucu pulang han. Bila pian suah mandangar kisah Intingan wan Dayuhan, bararti kita sama. Zaman bahari kadada pang yutube wan intirnit. Nang ada kisah dari muntung ka muntung ja.

Nang kaya apa kisahnya, ni ulun kisahakan nah ka bagian pian sakira kada panasaran.

Kisah Intingan wan Dayuhan 

Zaman bahari ada dua ikung badua ba-ading nang bangaran Intingan wan Dayuhan. Kisahnya Intingan nang jadi kaka, Dayuhan ading nya.

Ibarat kata, si Dayuhan nih inya orangnya kada tapi paham apa yang di padah-akan tu, atau bahasa kitanya, ada nang kurang kaitu nah.

Ujar kisah si ading nih kada hakun sakulah, macam macam alasan inya bapandir sakira kada sakulah. Karena kamunyakan manyuruh, akhirnya di hi-ih-hakan ai kahandak si Dayuhan ni supaya kada sakulah.

Suatu hari, pas Intingan handak bajalan satumat kaluar rumah, si Intingan bapasan wan Dayuhan. Jar si Intingan

👨 : Uy ading ku sayaang, bila mama bangun, jangan kada ingat ma-mandi-i mama wan banyu hangat kuku!

👦 : Ayuha ka.

Kisah paham si Dayuhan nginih napa nang dipadahi.

Tulak ai lagi Intingan ni bajalan kaluar rumah. Ma ancap si Dayuhan manjarang banyu. Pina banyu panas manggurak sudah si Dayuhan neh manjapai sampai barasa ka kuku. Oh jar Dayuhan, ini ngarannya banyu hangat kuku. Napang barasa sampai ka kuku jar. Himung ai si Dayuhan marasa bujur manggawi.

Bangun mamanya dari guring. Ujar kisah, mamanya si Dayuhan wan Intingan ni garing bangat. Saking bangatnya kada kawa ba apa apa lagi sudah, garing tuha saking tuhanya sudah umur mamanya.

Di mandi-akan ai oleh si Dayuhan banyu panas manggurak tadi ka awak mama nya. Marasa kapanasan mamanya Dayuhan sakalinya kada behinak lagi. Dikira si Dayuhan mamanya nih himung dapat nya mandi. Kubui barait tu pang si Dayuhan. Kada baingat lagi padahal kuitan sudah kada banyawa.

Sudah tuntung mandi, diangkat si Dayuhan ai mamanya tadi  ka tilam. Kada lawas habis itu datang Intingan.

👨 : Sudah lah mama ikam mandi-i ding?

👦 : Sudah ka ai, mama kahimungan di mandi-i ulun, kalapak kalapak sidin ka. Saking himungnya, taguring sidin pas mandi tadi. Coba pian liati ka.

Rasa pina ragu Intingan wan Dayuhan nih.  Sakali dilihati kuitan sudah kada banyawa, tabujur kaku wan jua awak tekelupas karena banyu panas tadi dimandi-akan.

Menangis Intingan melihati kuitan sudah kadada lagi, handak menyariki Dayuhan katia kada jadi hasil. Maluapakan emosi wan Dayuhan jua kadada guna, karena nasi sudah menjadi bubur.

Ujar Intingan batakun, "Kaya apa banyu nang ikam jarang tadi, Ding?"

Lancar si Dayuhan bakisah. Banyu hangat kuku tadi tu banyu panas pas manggurak di masuk akan ke kuku pina merinyut rasa handak pacul, oh ini namanya hangat kuku.

Bagiling kapala langsung Intingan mandangar panjalasan si Dayuhan nang salah pangartian. Mulai ai si Intingan bagamatan manjalas-akan ka Dayuhan kuitan sudah kadada lagi. Habis mandangar kisah ngitu, Dayuhan hamuk betinjak tinjak lawang mandangar kisah kuitan samata wayang sudah kadada lagi. Sambil bapadah minta maaf si Dayuhan wan kuitannya.

Supaya lakas di kuburakan, Dayuhan di suruh pulang mancari tuan guru untuk manyambahyangakan mamanya. Wan jua mancari sapi gasan basalamatan kaina.

Meancap Dayuhan nih tulak lagi. Tangah jalan inya nih kada tahu rupa tuan guru tu kayak apa.  Saingat pandiran padahan Intingan tadi, tuan guru tu nang mamakai surban putih, kupiah putih pokoknya saraba putih. Amun sapi ngintu inya babatis 4. Warnanya pina abu abu jar.

Bejalan ai si Dayuhan ni ka tangah hutan. Di sana Dayuhan malihat burung banyaaaak banar. Nah ini pinanya tuan guru jar Dayuhan.

"Uuii tuan guru pian disuruh kaka mandatangi ka rumah gasan sambahyang jenajah."

Ngaran burung neh kada menyahut. Sekali lagi inya bepandir,

"Uuii tuan guru dilajui datang jar kaka ulun gasan salat jenajah."

Burung nih langsung terbang melihat Dayuhan pina mamaraki. Aneh pikir Dayuhan.

Marasa kadada jawaban, bajalan lagi si Dayuhan nya ka dalam hutan. Sakalinya tatamu tikus. Kira si Dayuhan nih sapi itu tikus, sama pada beisi batis ampat, wan warnanya pina coklat abu kaya itu. Ancap ai ditangkapnya si tikus ni. Huimung muha Dayuhan babulik ka rumah.

Pas sampai dirumah, si Intingan batakun kayapa tatamu lah jar wan tuan guru, si Dayuhan bakisah tuan guru nya tarabang, dipandiri kada manyahut. Sudah ai lagi jar.

Nah jar si Intingan dalam hati, Dayuhan nih tasalah urang. Habis itu si Intingan batakun lagi, lawan sapi pang jar dapat lah. Si Dayuhan menyahut, dapat Ka. Ulun ikat tuh di bawah tangga. Jar Intingan mun sapi di ikat di bawah tangga ni pinanya  kakanak nginih salah tangkap bisa. Sakalinya pas diliati salah jua ai. Rasa bagiling kepala si Intingan nih manyuruh Dayuhan ni saraba tasalah.

Amun kaitu jar Intingan, ikam tunggui mama sambil jamur banih di muka rumah. Pakai kita baaruh malam ini. Mama nih harus lakas di urus wan disambahyangakan.

Habis itu si Intingan nang bacari tuan guru wan sapi. Pas si Intingan babulik takajut sambil bapusut dada, kanapa jadi banih bahambur di muka rumah, ayam rami memutiki. Sakali ditakuni, jar Dayuhan si Intingan manyuruh manjamur di muka rumah. Dikira dihambur. Astagfirulladzim jar Intingan sambil bapicik kapala karena malihat kalakuan nang ading kadada habisnya.

Pesan nang Kawa Diambil

Fungsi dari sakulah ma-ulah kita tahu, wan mambanyaki pangalaman wan ilmu gasan kita bawa kaina. Ilmu nang baguna wan bamanfaat untuk diri kita wan urang sakitar.

Salam sugar ❤

***

Nang manulis: Nisa (www.nisazet.com)

Nang ma-edit: Ira (www.irabooklover.com)