6 Macam Menu Sarapan Urang Banjar

Assalamu'alaikum sanak blogger

Apa habar pian hari ini? Mudahan sehat berataan lah.

Sarapan apa pian pagi ini? Amun ulun biasanya sarapan nasi kuning. Menukarnya di pinggir jalan tu nah nang banyak acil bejualan nasi kuning. Tapi tekenanya ada jua ulun nukar nasi goreng di warung ya tu sekira kada munyak. Hihi.

Kali ini ulun handak bekisah tentang macam-macam menu sarapan urang Banjar. Apa ja yo kira-kira menunya? Baca sampai habis tulisan ulun lah.

1.Nasi Kuning Banjar

(sumber gambar)

Nasi kuning masak habang ni pinanya menu nang paling rancak dijadikan menu sarapan urang Banjar. Mencarinya jua kada ngalih. Di pinggir jalan biasanya banyak acil-acil bejualan nasi kuning ni mulai nang harga 6000an sampai 15 ribu. Kaya yang ulun kesahkan di atas tadi. Iwaknya gin mulai hintalu, ayam, haruan sampai hati ada jua. Tekenanya bertambah tempe  atau mie ada jua nasi kuning ni tergantung nang bejual. Amun ulun ketuju makan nasi kuning pakai iwak haruan pang nah.  Kalau buhan pian katuju pakai apa?

2. Lontong Banjar

(sumber gambar)

Kawannya nasi kuning ni iya lontong. Inya biasanya amun ada urang bejual nasi kuning ada jua bejual lontong ni. Ulun ketuju jua makan lontong ni gasan sarapan tapi amun parut kada tahan bisa ke wc tarus am kesungsungan. Soalnya kuah lontongnya  besantan.  Habis dikuahi santan, lontong urang Banjar ditambahi lagi masak habang jua kaya nasi kuning. Iwaknya gin sama jua. Nah, amun pian handak merasai lontong nang terkenal di Banjar kawa ke Lontong Orari di Kampung Melayu.

3. Pundut nasi

(sumber gambar)

Pernahlah pian memakan Pundut nasi ni? Pundut nasi ini meulahnya beras dibuat di daun nang dibentuk kayak bungkus nasi imbah tu barasnya dikubui santan hanyar dikukus. Rasanya lamak-lamak kaya tu jadinya. Biasanya memakan Pundut nasi ni pakai sambal masak habang jua dikubui di atasnya. Amun rajin bisa jua makannya pakai iwak atau hintalu nyaman jua.

4. Buras / Lapat

(sumber gambar)

Nah amun buras atau lapat ni meulahnya pakai nasi lembek yang sudah besantan tu nah habis tu diandak di Daun pisang habis tu digulung kaya pais hanyar ditangkupkan dan diikat pakai tali rapia. Meikatnya ni pisit-pisit supaya burasnya padat. Habis diikat tu buras ni dijarang pulang sampai masak. Menjarangnya ni gin kada setumat jua 3 sampai 4 jam-an. Amun pundut nasi dimakan pakai sambal masak habang buras dimakan pakai sambal kacang.

5. Mie Habang

(sumber gambar)

Mie habang tekenanya jadi pilihan jua gasan menu sarapan urang banjar. Biasanya mienya ni ditambah intalu behiris. Ada jua mie habang nang makannya pakai kuah soto bertambah ceker tergantung selera nang memakan. Amun ulun makan mie habang ni betambah kecap aja pang biasanya.

6. Soto Banjar

(sumber gambar)

Menu terakhir yang biasanya jadi sarapan urang Banjar adalah soto Banjar. Soto Banjar ni nyaman pang dimakan gasan sarapan sebab rasanya nang berempah tu. Amun handak asik kawa jua makan soto banjar di pasar terapung di warung kapal sekira terasa sensasi makan di atas perahu. atau bisa jua pian mencobai soto bang amat atau soto Bawah jembatan nang terkenal nyamannya

Nah itu haja kira-kira info yang kawa ulun bagi lawan pian. Buhan pian katuju nang mana? Semoga bermanfaat gasan kekawananku seberataan.

Wassalamu'alaikum wr. Wb

***

Nang manulis: Antung Apriana (https://www.ayanapunya.com/)

Nang ma-edit: Enny Ratnawati (https://www.ennyratnawati.com)