Ampat Mainan Tahun 90-an Nang Wayahini Kadada Lagi

Apa habar buhan kakawanan setia Nisa?

Kakanakan wahini rami banar main hapi (hp). Bila inya haratan manangis diunjuki yutub (YouTube) ranai tu langsung. Misalkan dilihatakan kisah urang mandi bola kah, si joni joni yes papa kah, kisah upin ipin, nusa rara wan masih banyak lagi kisah yutub nang kadada habis-habisnya diulah orang. Rasa sadih malihat, dimana-mana kakanakan wayahini saraba hapi. Kamanakan ulun nang masih halus kayak hampial tu gen umpat jua mamainakan hapi.

Jadi, ulun di sini handak membawa-i bagian pian babulik ka masa dahulu, nang mana ulun bacari maainan ini kadada lagi kakanakan wayahini mamainakannya. Rasa sadih malihat nang sudah ganal kayak ulun nih mancari mainan kakanakan. Padahal dasar banaran rami bila bamainan mainan nang kayak ngini dulu. Biar hari panas, kada makan, sampai hakun ja bulik sanja saking raminya bamainan lawan kakawanan.

Apa-apa ja gerang mainannya tu? Ini nah mari kita lihat dibawah ni:

1. Batiwah

Batiwah maksudnya mahimapat kaleng bakas oli atau kaleng susu , undasnya kayu. Jadi siapa nang badahulu wan paling jauh menimbai kayu sehingga kawa mehamburakan kaleng, maka inya manang. Dan siapa yang paling parak menimbai undas ka kaleng inya nang kalah. Saban kamarian bemainan ini, banyak manusia nang umpat. Bila uyuh hanyar ampihan, biar sampai sanja. Dasar rami banar bamainan ngini.

2. Bamainan Gambar

Harga sabuting gambar ni 1000 rupiah. Macam-macam rupa gambar lawan cara mamainankannya. Di potong tunggal butingan, bisa gasan main bekompak, main betimbai sandal dalam lingkaran, bisa jua main be-dum.

Nang paling rami bila kebanyakan menang sudah gambar ni baparabut. Nang ampun gambar mehambur gambar di atas mija, atau di atas nang tinggi pada kakawanan, jadi kakawanan nang dibawah nang tukang putiki gambar hasil parabutan tadi.

3. Meteor Garden

Meteor garden bahasa nang dari mana asalnya. Ini mainan kutak ruku, jadi setiap kutak ruku belain lain nilainya. Bila kutak ruku sampurna dinilai 1K karena saking nyamannya cacariannya, semakin ngalih kotak rukunya semakin tinggi nilainya. Memainkan meteor garden bisa badua batiga ba-ampat, samakin banyak urang nang umpat, semakin banyak dapatnya bila menang haha.

4. Tali Gatah

Galang gatah bahari musim banar, sampai yang handak japuk masih ja dipalar. 

Jadi tali gatah nih disusun tunggal butingan. Bisa dimainkan tali ulai, bekodok, betimbai, sing duduk, sing diri, singkaladi beolah katikan cacak atau gasan disimpani. 

Bila bamainan ini tangan hakun ganting dapatnya gatah di andak di tangan kiri wan kanan, makin banyak gatah yang dibawa makin ganting pegelangan tangan.

Nah itu mainan kakanakan di zaman 90-an. Jaka kawa meulang waktu, buhan pian handak main nang mana?  Amunya kawa, ulun handak main sabarataan, sakira ma-ingat memori ulun bahari pada suah marasani mainan kaini.

Salam sugar

Nisa ❤

***

Nang manulis: Nisa (www.nisazet.com)

Nang ma-edit: Ira (www.irabooklover.com)