Banjarmasin di Mata Tetangga

Assalamu’alaikum. 

Apa habar buhannya berataan? Mudahan sehatan haja. Nah, hari ini ulun handak bekisah soal Banjarmasin di Mata buhan kami, buhan Palangkaraya. Sebagai warga provinsi tetangga Kalimantan Selatan, tepatnya urang Palangkaraya, Kalimantan Tengah -tapi sawat lawas jua bediam di Banjarmasin- , ulun jadi kawa melihat kayapa orang luar Banjarmasin beisi kesan tersendiri di mata buhan Palangkaraya.

Hmmm, kesan apa lah? Baik kah atau buruk kah? Hihihi, mun pian penasaran lanjut haja membacanya. Nah, ini lima hal tentang Banjarmasin di Mata Penduduk Palangkaraya :

1. Wadah  Hiburan

Bagi buhan kami yang urang Palangkaraya, Banjarmasin adalah pusat hiburan nang mana dasar tabanyak arena hiburannya atawa baramiannya dibandingkan kota Palangkaraya. Bisa dipadahakan , jauh banar, Di Banjarmasin ada mall besar, lengkap banar isinya. Di Banjarmasin jua ada Transstudio (yang ada di kota besar lain di Indonesia), Taman Lalu Lintas, Siring, Wisata Susur Sungai, dll.

2. Gasan liburan dan belanja
Karena hibak wadah gasan hiburan tadi, pasti sudah jadi tujuan liburan. Bila sudahnya libur sekolah, lebaran, bahkan Natalan, umaaa heh, Palangkaraya makin sunyi. Sudah sunyi di sini makin sunyi. Menyubalah semuaan urangnya ke Banjarmasin.Apalagi parak haja wahini. Sadarlah pian yang di Banjarmasin  kalau kami datangan ke situ? Hehe

 
3. Urangnya bungas-bungas
Nah, poin tiga pasti meulah buhan pian kujihing- kujihing lo. Hahaha. Tapi dasarnya, kami di sini melihat kaitu, apalagi buhan lelakiannya.  Jadi buhannya tu ke Banjarmasin selajur menyelajur refreshing mata jah selain otak. Hahaha. Apalagi nang masih bujangan lah. Mauk jua si amang nih lah.

4. Urang Banjar itu sugih-sugih
Ini terutama nang pedagang pang lah. Tapi dasarnya rata-rata pendatang dari Banjar nang bedagang di sini. Juragan sapi di sini jua urang Banjar, toko emas jua bubuhan Banjar, rumah makan laris jua ampunnya haji urang Banjar, sampai yang jualan ciki-cikian di pasar jua urang Banjar. Hen, jangan salah pian, yg bejualan ciki-cikian gen sugih di sini. Tapi kada jua pang lah semuaan urang Banjar sugih, nang biasa kekaya kami banyak haja jua. Hihi. Urang dayaknya pang kayapa? Percayalah buhan pian, kebanyakan mereka jadi PNS di Kalteng.

5. Terlalu padat
Kami di sini biasa jalan lengang dan bisa dipadahakan mustahil ada macet. Habis tu, jalan di kota kami ni lebar-lebar, tapi penduduknya kada banyak. Jadi, bilanya ke Banjarmasin lalu ae merasa padat banar. Jalannya halus halus ha pulang. Kada sebanding lawan penduduknya. Macet liwar. Lawan jua Palangkaraya ni, kotanya jauh labih rapi dan bungas tu pang. Bisa di Banjarmasin tadahulu banyak penduduk kalo lah, jadi kada sawat meolah tata kotanya dulu alias bedudi.

Nah,  buhannya itu pang tadi lima fakta Banjarmasin di mata kami, urang Palangkaraya. Lima tahun dah parak bediam di sini ulun mulai tabiasa tu pang lawan keadaan di Palangkaraya.

Sebagai urang yang introvert mungkin ulun labih katuju bediam di kota Palangkaraya, karena di sini masih damai alias kada padat bin macet. Tau am pulang mun jadi pindah ibukota RI. Ay, doa ulun kada usah gin. Eh, doa kami di sini toh. Hi ih, tau lah, banyak yang kada setuju jua. Hihihi

Baiklah, ulun sudahi sampai di sini. Bila ada salah kata tulung dimaafkaan. Salam damai dingsanak, dari kami buhan tetangga Banjarmasin.

Wassalamualaikum

Penulis :Fika (www.latifika.com)

Editor   : Enny (www.ennyratnawati.com)